ميار: زوجي اتجنن يتهمني بخيانته مع البواب وماقدرتش أكمل حياتي معاه

بنظرات حائرة وعيون تملئها الحسرة والقهر استهلت "ميار" صاحبة الـ 25عام ذات القوام الممشوق والبشرة البيضاء والعيون الخضراء حديثها لـ"الميدان"قائلة : بدأت معاناتي منذ أن تزوجت "علي" بالرغم من أننا تزوجنا عن قصة حب عظيمة كالأساطير  وظننت أنني وجدت سعادتي ولكن الواقع عكس ذلك.

انهارت"ميار" باكية ثم هدأت واستأنفت حديثها قائلة: في بداية زواجنا شعرت وكأنني في الجنة من شدة حب جوزي ليا واهتمامه بيا حسيت بسعادة عمري ما عيشتها وبعد سنة رزقنا الله بطفلتي"قمر" وحينها فرح زوجي للغاية وقال لي بكل حنان: أنتي وقمر حياتي كلها   فتمنيت أن تستمر هذه السعادة وأن يحفظ الله لي أسرتي ولكن القدر كان له رأي أخر.

استطردت"ميار" تسترجع الذكريات ثم قالت: الغيرة أساس الحب لكن غيرة عن غيرة تفرق جوزي وصلت الغيرة معاه للشك فأي حد أكلمه أكيد في بيني وبينه حاجة .

في البداية كنت سعيدة جدا إن جوزي بيغير عليا من شدة حبه ليا لكن بمرور الوقت اتحول "علي" لشخص تاني معرفوش  يعني مثلا اشتريت هدوم جديدة وخرجت بيها ورجعت احكيله عملت إيه مع أصحابي فبقوله: شوفت ياحبيبي صاحبي قالولي الهدوم ديه حلوة جدا وأني شكلي حلو انهاردة.

وهنا اتفاجئت برده وهو بيقولي:آاااااه وأنت جايبة الهدوم دي بقي عشان تعجبي بيها مين ؟!!!

من الصدمة سكت ومشيت من قدامه بعدها دخل الأوضه وصالحني وقالي ماتزعليش ياحبيبتي أنا بغير عليكي مش عايز أي حد يشوفك حلوة غيري أنا وبس .

لكن لم يقتصر الأمر علي ذلك إلا أنه بقي لو كلمت السوبر ماركت طلبت حاجات للبيت يبقي أنا معجبه بصاحب المحل ولو نزلت واتأخرت بره يبقي كنت بقابل حد وما بقاش بيخليني أكلم أي حد نهائيا حتي أصحابي كل ده استحملته وسكت لكن أنه يفكر أني بخونه مع البواب ده كده يبقي جنان رسمي .

في يوم من الأيام كان واخد إجازة وقاعد معايا في البيت وكنت أنا طلبت من البواب حاجات كتير للبيت يجيبها من السوق والبواب طلع ونزل كذا مرة وفجأة لاقيت "علي" بيقولي للدرجة دي مش قادرة على بعده حتى وأنا في البيت وأنهال عليا ضربًا وقطع لي هدومي روحت صرخت في وشه وقولتله: أنت أتجننت رسمي أنت بتشك فيا ومع مين مع البواب طلقني يا "علي"  مستحيل أعيش معاك راح قالي: طلاق ما بطلقش عايزاني أطلقك عشان تروحي تخونيني مع طوب الأرض لاااااا أنت هتفضلي كده وهحبسك في البيت زيك زي أي كرسي فاهمة ولا لأ؟!!.

ولأني  فاض بيا من سوء معاملته قررت أني أرفع عليه قضية خلع في محكمة الأسرة عشان أخلص من العذاب والإهانة وبالفعل قضت لي المحكمة بقبول الخلع وقررت أني أعيش لنفسي ولبنتي على الأقل هعيش بكرامة ووقتها بس عرفت أن مش كل الغيرة حب، في غيرة بيكون أساسها الشك.