السيسي من الكاتدرائية: "احنا بنتعامل بشرف فى زمن مفيش فيه شرف"
هنأ الرئيس عبد الفتاح السيسى، الأخوة المسيحيين، قائلًا: "كل سنة وانتو طيبين جميعا، الاستقبال بتاعكم جميل أوى ورائع، وقد ايه إحنا نحب بعضنا أمر جميل"، وردا على هتافات:"بنحبك يا ريس"، قال الرئيس السيسي:"وإحنا والله بنحبكم".
وأضاف الرئيس السيسي، خلال زيارته إلى كاتدرائية ميلاد المسيح بالعاصمة الإدارية الجديدة لحضور قداس عيد الميلاد المجيد، "أنا شايف المصريين قلقانين، انتو قلقانين من إيه؟، مفيش مجال للقلق، لسبب واحد، إن احنا مع بعض، وطول ما إحنا مع بعض محدش يقدر يعمل فينا حاجة، وربنا سبحانه وتعالى أراد إننا نكون فى ظروف صعبة، بس ده لينا وعلينا، لينا إننا ناخد بالنا وننتبه ونلاحظ ونقول، كان ممكن يبقى حالنا كده وظروفنا كده، ايوة، وعلينا إننا نخلى بالنا من بلدنا، طول ما إحنا مع بعض والشعب المصرى ايد واحدة محدش يقدر يعمل معانا أو فينا حاجة، ولا حد يقدر يجرجرنا هنا ولا يجرجرنا هنا، واحنا قادرين بفضل الله سبحانه وتعالى وبدعوات الناس الطيبين زيكم ان ربنا يلهمنا الصدق والبصيرة ونبقى شايفين وفاهمين كويس قوى الإجراء الأفضل اللى ممكن نعمله".
وتابع:"احنا بنتعامل بشرف فى زمن مفيش فيه شرف، ربنا موجود فوق ومطلع علينا، ولا يمكن أبدا ربنا ينصر إلا الأشراف والمخلصين والأمناء والمحبين لبعضهم البعض، وكلنا مع بعض"، مضيفا للبابا تواضروس:"تسمحلى أقولك كل سنة وانت طيب، وأرجو إن الوردة دى تصل لكل المصريين".