"مستشفيات البزنس".. إصابة مولود بسكتة دماغية بسبب الإهمال الطبي في مستشفى تبارك

حالة من الغضب سادت رواد موقع التواصل الاجتماعي "فيس بوك" عقب نشر هبة القربي، عمة مولود تعرض للإهمال الطبي داخل مستشفى تبارك، أثناء ولادته بالمستشفى، مما أدى إلى إصابة الطفل بضيق في التنفس، وسكتة دماغية، نتيجة نقص في الأكسجين لمدة تجاوزت 15 دقيقة أثناء ولادته، ونزيف في الرأس، محملة الدكتور محمد سويد، أستاذ نساء وتوليد، وإدارة المستشفى المسئولية كاملة.

 

وقالت “القربي”، في تدوينة لها عبر حسابها على موقع التواصل الاجتماعي “فيس بوك”، المفروض إن مرات أخويا كانت في آخر أسبوع في التاسع وربنا كتب لوالدها إنه يتوفى و فضلنا نتصل بالدكتور محمد سويد علشان نسأله هل ينفع تسافر في الوقت ده ولا لأ علشان تروح دفن و عزا باباها والدكتور ما بيردش، رحناله تاني يوم علشان تكشف و قلناله إنه ما ردش، طيب لو حالة ولادة هيعمل إيه، المهم أكد أن لو ولادة المستشفى بتبلغه و بيجي ، وبعد الكشف الدكتور قالها لسه في خلال أسبوع الولادة” .

 

تابعت: "في اليوم التالي شعرت مرات أخويا بآلام الولادة الكلام ده كان عالعصر تكلمه ما يردش، فكلمته من موبايلي فقالي تروح على المستشفى، راحت المستشفى وطلع الموضوع ولادة و الدكاترة قالوا هنكلم الدكتور سويد لما تقرب تولد.

 

أكملت “القربي” في سرد تفاصيل واقعة الإهمال: "أولا دكاترة التخدير عملوا ضهرها حقل تجارب حوالي ٢٥ مكان للحقنة ويقولولها أصل الفقرات ضيقة عندك، قعدنا ساعات معاها لحد حوالي الساعة ٥ الفجر، نسألهم، الدكتور فين ؟؟!! ردهم ها يجي ، ها نكلمه قبلها ، لحد ما وصلنا لوقت الولادة خدوها عالعمليات نسألهم فين الدكتور يقولنا جه وبيركن وطالع، وشويه الدكتور جوه وإحنا كنا جنب العمليات والدكتور أصلا ما جاش يعني كدابين و ما فكرش يسأل عن حالته خالص".

 

استطردت: "نيجي بقى للبيبي تسألهم فين البيبي يقولوا لسه شوية و يخرجلكم وإحنا طبعا برة قلقانين مش سامعين صوت بيبي خالص، نبعت التمريض يسألوا أصل لسه شوية ويخرج، ابتدينا نقلق الموضوع فات عليه أكتر من ساعة و ما حدش بيطمنا و بعد ما خدوا لبس البيبي رجعهولنا طيب ليه؟؟؟؟ هنا بقا تقريبا قرروا يصارحونا إن البيبي محتاج حضانة ضروري لأن عنده ضيق تنفس، طيب ما انتوا عندكم حضانات ، قالولنا لأ الحضانات افتتاحها السنة الجاية طيب ليه ما عرفتوناش كدة!!!!!

 

أضافت: "شوية و ابتدينا نتصل بإسعاف تنقل الولد حضانة، الولد ابتدى يتشنج و رقبته اتعوجت شكل أول مرة نشوفه، منتهى التناكة من دكتور الأطفال باستثناء دكتورة علا كانت رحيمة في الرد معايا شوية، دخل محمد حضانة تانية طلع عنده نزيف على المخ و اللي اكتشفناه إن حصل نقص أكسجين لمدة أكتر من ربع ساعة أثناء الولادة، و امبارح رحنا لدكتور أطفال أكدلنا إن كل ده حصل نتيجة إهمال أثناء الولادة وإن الطفل حصله سكتة دماغية و تأثيرها مش ها يبان إلا بعد ثلاثة أشهر على الأقل”.

 

تابعت: "الدكتور اللي ما جاش و لا فكر يهتم بحالته و دكتور الأطفال نتصل بيه نسأله عن حاجة لما رحنا حضانة يقولنا أنا كاتبلكم في التقرير زي نظام اخلصوا ما توجعوش دماغنا، يعني بسبب إهمال واستهتار المستشفى طفل يعيش عمره يعاني من ده، طفل يقعد ١٤ يوم في حضانة بعيد عن أمه بره المصاريف خالص وكلكم عارفين أسعار الحضانات في مصر الألم المعنوي ، طفل وارد يكمل حياته بمشكلة بسبب قصور”.

 

واختتمت عمة الطفل حديثها قائلة: "إنتوا مش ممكن تكونوا ملائكة رحمة أبدا الموضوع أصبح بيزنس وبس و طز في حياة كل الناس".