"الكيف بيذل".. تخريم في الأمعاء والسر في "الإستروكس"

تعتبر المخدرات هي آفة المجتمعات التي تُدمّر الإنسان بسبب تأثيرها السيئ الذي يُفقد المدمن صحّته وماله وعقله، وقد تكون مواد طبيعيّةً أو مواد مصنّعة وتسبب الخمول والكسل لها أضرارٌ كبيرة على الجهاز العصبي والتنفسي، وتُسبّب للمتعاطي العديد من الأمراض الجسديّة والنفسية والاجتماعية .

 

والمخدّرات أنواع، وتختلف هذه الأنواع من حيث مصادرها وتأثيرها على الإنسان ومنها: الحشيش، والأفيون، والقات، والمورفين، والكوكايين، والكراك، وحبوب الهلوسة، والهروين وصولًا "الإستروكس" و"الفودو" وهما من أكثر أنواع المخدرات خطورة.

 

ورصدت عدسة "الميدان" أحد ضحايا المخدرات والذي يدعي"م،ن" وشهرته"سمارة" 30 عاما، وتحدث عن رحلته مع المخدرات والضرر الذي ألحق به من تأثيرها المدمر فاستهل حديثه قائلًا:

 

“بدأت رحلتي مع المخدرات بسيجارة مع صحابي علي القهوة صاحبي كانوا بيشربوا سجاير محشية مخدرات حشيش وغيره وكل مرة كانوا بيعزموا عليا إني أشرب معاهم كنت برفض ولكن ما قدرتش أقاوم كتير بسبب كثرة المشاكل اللي عندي”.

 

واستأنف حديثه قائلًا: “أنا عاطل وماليش شغلانه أكل منها عيش وأهلي هم اللي بيصرفوا عليا من بعد ما خلصت معهد الكمبيوتر والموضوع ده تاعبني نفسيًا جدًا لإني شاب وعايز أصرف من حر مالي مش أهلي اللي يصرفوا عليا ، دورت علي شغل كتير بس ماوصلتش لحاجة لحد ما الموضوع وصل معايا لدرجة إني دخلت في إكتئاب حاد وسيبت البيت ونزلت علي القهوة قابلت "عصام" صاحبي قالي ايه ياعم مالك حكيتله راح قالي خد جرب السيجارة ديه وأنت تنسي كل الهم ده وهتبقي فل وفعلًا شربت السيجارة ديه وحسيت نفسي واحد تاني حاسس بسعادة غربية مش عارف سببها ومن هنا جت رجلي في المحظور وسيجارة ورا سيجارة بقيت متعاطي للحشيش”.

وأضاف "سمارة": ما بقاش بيرح أعصابي وبينسيني الهم اللي أنا فيه غير شرب الحشيش وبعدها بدأت أجرب البانجو وكل ما كنت أحس بزيادة في المتعة والسعادة بتزيد عندي الرغبة في إني أجرب أنواع أكتر وأكتر لدرجة أني بقت حياتي كلها هي الشرب وصحابي اللي في القهوة حتي أهلي نسيتهم .

 

وتابع، “لكن لما أسعار المخدرات عليت كان لازم إننا كمتعاطين للمخدرات إننا ندور علي مخدر جديد لحد ما لاقينا تاجر من تجار المخدرات بيقولنا إن في مخدر جديد سعره أقل بس مفعوله سحري اسمه "الأستروكس" وبالفعل بدأنا نشتريه منه وفعلا كان جبار مالوش حل بيخلينا في دنيا تانية ومن كثرة ما كنا بنشتري الإستروكس من التاجر ده بقي بيحضروا قدامنا ومن هنا عرفنا مكونات خلطة المخدر اللعين ده وطلع بيتكون من مصايب وهي"بودرة صراصير ، وبوردة مكافحة قوارض ،وسم فئران،واسيتون،وسيبرتو أبيض،وكولة ، ومبيد حشرات وبيقوم بخلط ده كله مع أعشاب البردقوش ومن هنا بيطلع مخدر "الأستروكس" .

 

واستكمل، “الإستروكس من روعة تأثيره خلاني أنسي المخدرات التانية كلها وجت عليا فترة بقيت بشرب منه بلا وعي كميات كبيرة وما ببقاش داري بأي حاجة وبقيت أعمل مشاكل مع أهلي في البيت وبتعامل معاهم زي المجنون أكسر وأضرب وأزعق لحد ما بدأوا يربطوني لما تجيلي حالة الهياج ديه وفي يوم بعد ما شرب كمية كبيرة من الإستروكس حسيت بسكاكين بتقطع في بطني وقتها نقلوني أهلي علي المستشفي وبعد الفحوصات والأشاعات علي المعدة طلع عندي "تخريم في الأمعاء" نتيجة شرب الإستروكس ولازم أعمل عملية استأصال لجزء من الأمعاء عشان أقدر أعيش وفعلا عملت العملية وأول حاجة عملتها بعدها إني قاطعت المخدرات بكل أنواعها لإنها هي اللي دمرت حياتي وكانت هتخلص عليا لإن فعلا "الكيف بيذل" لكن ربنا كتبلي عمر جديد ووقتها أتأكدت إن أول ضحايا المخدرات هم ضعاف النفوس”.