ميدو مهاجمًا كوكا: مهاجم متواضع ولا يصلح للعب الدولي

هاجم أحمد حسام ميدو لاعب الزمالك الأسبق، أحمد حسن كوكا مهاجم فريق كونيا سبور التركي ومنتخب مصر، رغم المستوى الذي يقدمه مع ناديه.

وقال أحمد حسام ميدو، في تغريدة عبر حسابه الشخصي بموقع التواصل الاجتماعي تويتر، عن أحمد حسن كوكا: مهاجم متواضع لا يصلح للمستوى الدولي حتى ولو أحرز 1000 هدف.

ورد أحمد حسن كوكا بشكل مباشر على تغريدة ميدو، كاتبا: مهاجم متواضع؟.. أولا هو أنت أصلا مين طلب رأيك؟.. ثانيا: أنت مبطل كوره وأنت عندك 29 سنة وكل الناس عارفة ليه.

وتابع مهاجم الفريق التركي: ثالثًا.. لو رقم الأهداف اللي أنا جايبه، شايفه قليل؛ ماجبتوش أنت ليه؟، مع إن اللي بيلعب في نادي أكبر، فُرَصُه بتكون أكتر في التسجيل، رابعًا.. حاولت تبقى مدرب ومابتكملش شهر في أي نادي.

وواصل كوكا: خامسًا.. بتحاول تبقي إعلامي وتتكلم عن ده وده؛ عشان تبقي تريند بأي شكل، أي حاجة عايز تدخل فيها، ده حتى صلاح في أول مشواره، كنت بتتكلم عليه وحش، الحقد عالي أوي عندك من زمان، وأنت بتتكلم وحش عني.

واختتم أحمد حسن كوكا، حديثه: ‏‎‎وأنا عارف إن أكبر غلط، إني أرد عليك، وأنت فاضي وعندك برنامج تتكلم فيه كل يوم، بس أنا بردوا مش هيهدني كلامك، وهفضل في طريقي، مركز في مستقبلي، ومش عايز حاجة من الناس بعد ما أبطل كورة وبعد أما أموت؛ غير السيرة الحلوة.

ويقدم أحمد حسن كوكا، مستوى مميز رفقة كونيا سبور، منذ انطلاق الموسم الحالي، حيث قاد فريقه نحو التأهل إلى دور الـ16 من بطولة كأس تركيا، بعد الهدف الذي أحرزه مساء أمس، في مباراة فريق عمرانية، في دور الـ32 من البطولة.

ويشار إلى أن البرتغالي كارلوس كيروش المدير الفني لمنتخب مصر، استبعد أحمد حسن كوكا من القائمة النهائية للفراعنة، المقرر مشاركتها في منافسات بطولة كأس الأمم الإفريقية، في الكاميرون من 9 يناير وحتى 6 فبراير.