الصباح والبنا.... الإخوان والحشاشسن
رباب حرش
كان ياما كان ،يا سعد يا إكرام ولايحلي الكلام إلا بذكر النبي عليه الصلاة والسلام
كان فيه اتنين اسمهم حسن
نفس البداية والرواية , إلا أن النهاية كانت من نصيب واحد , أما التاني مستنينا نحط له الختام
الأولاني حسن الصباح , والتاني حسن البنا , ومابينهم من أحوال العرب حكاوي لها العجب !!
الفرنجة لما داسوا الأرض صبحوا مسيطرين والعرب مستسلمين , واجتمع الضدين : القوة للفرنجة والضعف للعرب
تطرف وإصرار للفرنجة مع لهو وفساد للعرب .
ولما انتصر الصليبين ما لقينا رد فعل إلا من فرقة الحشاشين
أخطر الجماعات الدينية وقتها
واللي كانوا متجمعين في مكان حصين اسمه ( قلعة الموت )
بين افغانستان وايران موجودين ،هدفهم القضاء ع الأنظمة وتنصيب الإمام .
والحقيقة كانوا منظمين وفي الانتشار متوسعين ؛واسمع الأهم وخدبالك , امامهم الصباح قالوا : اتولد بايران إنما أصله عراقي أو يمني ماتعرف من كتر الكلام .
وكل مازاد ضعف الحكومات زاد بطش الجماعات , جريت تقتل وزرا وكبار مسؤلين وصبح العرب ويلهم ويلين بين الحشاشين والصليبين .
وعشان ماحدش فيهم يشك قتلوا كونراد الفرنسي حاكم القدس وكأنهم مش ضد العرب و متسلطين إنما ع الجهاد ناويين ؛ لحد ماوصلوا لصلاح الدين وحاولوا يقتلوه مرتين !
مين فينا يعرف إن كلمة إرهابي أصلها حشاش في لغوة الأوروبين ؟!
المهم اسمع , وبراحتك استغرب لأنهم اختاروا من سوريا مأوي ومهرب , إنما ع القاهرة كانت عينهم ،صلاح نظم حملة وحاصرهم كان بيحاول يخلص من شرهم لكنه فك الحصار وانسحب لما علم الأهم
الصليبين علي وادي البقاع هجموا وماعاد مفر ، وبسرعة جهز جيش مصري قوي وبفرق عربية مطعم
حرر بيه القدس .. وبس !
تخيلوا اختفي الحشاشين مع النصر , ولا عاد لهم مأوي ولاحصر , مافيش الاذكري لمن يعتبر .
ولا حد عرف إن كانوا خرجوا من مكر الفرنجة والا ضعف العرب !
وروح يا زمن وتعالي يا زمن , يحتل الانجليز الوطن وفي سنة تمانية وعشرين يخرج علينا حسن البنا يكون الاخوان المسلمين
وم السنين بقالنا اربعة وتسعين ويخرج الاحتلال وننتصر الا إنهم موجودين !
دا اللي يثبت إنهم فكرة مش فرقة أسمها الاخوان أو الحشاشين
الفكرة مش بس هتتغير بالجيش لااا دي عاوزاك تعرف الدين وتعمل بيه ، وتقوي اقتصادك ، والفقر تقضي عليه وتصمم تعلم عيالك والجهل ترميه
واوعاك تفكر في طرق عادية أومتجربة
احنا في زمن المستحيل بقي موهبة
إن كنت ناوي تقصر وتنهي المسألة
وتوتة توتة لسة ما فرغتش الحدوتة , بس اللي عملته قسمتنا نصين نص بيقول :حلوة , والتاني : ملتوتة !