نانسي عجرم: اتعلمت سواقة العربيات وعمري 9 سنوات وغنيت بعمر 3 سنين

قالت الفنانة نانسي عجرم:"بابا علمني السواقة في عمر الـ9 سنين، وكنت بسوق السيارات في فترة الصيف في طريق الجبل، وكنت اخد اصحابي واخواتي واخرج معاهم بالسيارة، ومرة بابا قرر يبعتني مشوار لوحدي علشان يخليني مخافش فاسوقت لوحدي للسوبر ماركت وانا ماشية لقيت ماما بتجري ورايا خايفة عليا ووصلت قبل ما أوصل السوبر ماركت".

غناء نانسي عجرم في الطفولة

ولفت خلال لقائها ببرنامج “سهرانين” الذي يقدمه الفنان أمير كرارة بقناة “أون إي”:"لما اكتشفوا ان صوتي حلو وانا عمري 3 سنين وقتها كنت بغني في البيت للكبار والأطفال، واردد ورا ستي اغنية انا قلبي لك ميال، وبابا كان عايزني اكون مشهورة بالغناء وانا صغيرة وكان بيعلمني وانا صغيرة ويخليني اشترك بمهرجانات غنائية وانا صغيرة، وبابا لما كان حد يزورنا بالبيت كان يناديلي ويقولي تعالي غني لنا، وصوتي الحلو وراثة من جدتي".

دعم والد نانسي عجرم لموهبتها

وتابعت:"بابا كن عنده طاقة قوية وشايف فيا شيء حلو بالغناء وعايزني اشتهر واكون مطربة، وكان يحفظني اغاني كبيرة وانا صغيرة خاصة مع عمر 9 سنين، ويخليني اسجلها بصوتي في الكاسيت".

مشكلة نانسي عجرم في المدرسة

ولفتت نانسي عجرم:"المدرسة اللى كنت فيها ما كانوا يحبوا فكرة اني اغني وعمري صغير، مدرستنا كانت قريبة من البيت وانا كان نفسي احب اغني بالمهرجانات والحفلات القريبة من البيت، بس هما في المدرسة كانوا يقولولي ازاي تسهري تغني في حفلات برة المدرسة وتيجي تاني يوم الصبح إزاي هتركزي في دراستك ومش مليح بعمرك وحرام تضيعي دراستك وتعليمك، بعدها بابا اكتشف الحكاية فعلق يافطة عليها اسمي امام المدرسة اني هاعمل حفلة وهو كان مؤمن بيا وبموهبتي، وغيرلي المدرسة لمدرسة تانية بيحبوا الفن والغناء وكانوا بيعملوا حفلات ويخلوني أغني فيها ولقيتهم فرحانين بيا".