الراقصة هندية عن ترك كلبها في الشارع: أنا مش جاحدة.. ومقدرش أفوت الصلاة

كشفت الراقصة هندية، كواليس تركها كلبها في الشارع، بعدما انتشر مقطع فيديو لها وهي تلقيه خارج سيارتها وسط اتهامات لها بإلقائه في الشارع والتخلص منه لمرضه، وهو ما عرضها لانتقادات لاذعة خلال اليومين الماضيين.

وأكدت هندية أنها لم تلقِ بكلبها في الشارع، مشيرة إلى أنها ذهبت للاطمئنان عليه في منزلها بأكتوبر والذي تركته به مع الغفير قبل شهرين، وذهبت إلى منزلها الثاني في المهندسين، وعندما ذهبت فوجئت به مريضًا دون أن يخبرها الغفير، ما أصابها بصدمة.

وقالت هندية:عندي بيت في أكتوير فيه جنينة، سيبت الكلب في رعاية الغفير ومراته، قلت مش هقدر أكون في أكتوبر حاليًا وروحت بيتي في المهندسين، وبعد شهرين روحت أشوف الكلب لأنه زي ابني وبقى له خمس سنين معايا، لما شفته صوتت لأنه كان فيه حاجة غلط، وكان عنده هذيان مش مكسور زي ما اتقال، لأن الرفق بالحيوان قالوا صحته زي الفل لكن عنده هذيان.

وأضافت: وأنا بحطه في العربية عمل بيبي عليا، فسيبته مع السايس وقلت له هروح أصلي وأرجع له، وأنا لا أتباهى بالصلاة ولكن لو أبويا وأمي طلعوا من القبر وقالوا لي تعالي في اللحظة دي مش هروح، مش بحب أجمع وقت على وقت وبكون عصيبة جدًا، ولما رجعت كنت جايبة له وجبة أكل إشمعنى صوروني وأنا برميه وما صورنيش وأنا جايبة له الأكل؟.

وأردفت: لو ناوية أرمي الكلب، همشي بيه من أكتوبر للمهندسين، كنت ممكن أرميه في أكتوبر من غير ما حد يشوفني، معنى كده إني واخداه علشان أعالجه، لأني كنت بعتبره ابني وبعشقه.

قالوا عليا جاحدة

واستكملت: لقيت الرفق بالحيوان بيتصلوا بيا، وقالوا لي اللي بتعمليه ده جحود، ولما حكيت لهم اللي حصل اعتذروا لي، ولما روحت الجمعية مكانوش عاوزين يوروني الكلب وقالوا لي لما يقف على رجله، قلت لهم أي مصاريف أنا متكفلة بيها.

بمشي بزفة كلاب

ووجهت هندية رسالة إلى منتقديها قائلة: تعالوا في منطقتي بمشي في زفة كلاب بنزل قبل صلاة الفجر أحط لهم أكل، إزاي أكون جاحدة، لازم تسألوني قبل ما تتهموني، وفي حد ورا انتشار الفيديو وفي 200 أكونت بيشتموني وأعتقد أنهم لجان إلكترونية.

وعن الانتقادات التي تعرضت لها قالت: أنا مش بعرف أشتم ولو متعصبة أشيل كرسي أرزعه في وش حد، عمري ما قلت لفظ وحش، ما اعرفش أقول يا ابن كذا، بعتذر عن كلمة خدامين، ويا سفلة ويا حسالة اللي قلته لهم في الفيديو، لأني مش عارفة أشتم.