جوري بكر: «الناس كرهتني بسبب أدوار الشر ولو عملت دور طيب مش هيليق عليا»

 

قالت الفنانة جوري بكر، أنها شعرت بأن الجمهور كرهها للغاية بسبب أدوار الشر التي تقدمها في أعمالها الفنية، موضحةً أن دورها في "برغم القانون" به شر أكثر من دور وداد في جعفر العمدة.

 

 

وتابعت جوري بكر، خلال مداخلة هاتفية في برنامج «تفاصيل»، مع الإعلامية نهال طايل، والذي يعرض عبر فضائية «صدى البلد 2»: «كنت خايفة جدًا لما قريت دوري في مسلسل برغم القانون، لأنه دور صعب جدًا والمخرج شادي عبدالسلام هو اللي رشحني للدور والمنتج ريمون مقار.. قولتلهم ليه أنا اللي أعمل الدور ده قالولي مش شايفين حد غيرك يقدر يعمل الدور ده».

 

 

وأشارت جوري بكر، إلى أنها سعيدة للغاية بمشاركتها في مسلسل «برغم القانون» كونه أول بطولة مطلقة للفنانة إيمان العاصي في الدراما، وكانت متخوفة للغاية حتى لا يعتقد البعض بأنه يتذكرني بأدوار الشر فقط، معقبة :«حاسة أني لو عملت دور طيب مش هيليق عليا».

 

 

 

 

وتحدثت جوري بكر عن كواليس العمل مع إيمان العاصي في برغم القانون قائلة :«كواليس جعفر العمدة كانت جملية وقربتنا من بعض في برغم القانون لأن معظم الوقت قاعدين مع بعض في الكارفان وإيمان طول الوقت مركزة وبنتكلم عن المسلسل وتفاصيله والثغرات اللي بين كل مشهد ومعظم الحلقات مكانتش موجودة والمخرج كان بيحكيها لينا فكنا بنحسها ولما كنا بندخل المشهد مش بنحضر أو نراجع».

 

 

واختتمت جوري بكر حديثها قائلة: «إيمان العاصي من الشخصيات الجميلة ولما قربت منها حبيتها أكتر وهي هادية جداً مهما كانت في أحداث حواليها عامله زي الأطفال الصغيرين تاخد كرسي وتقعد على جنب وملهاش دعوة بأي حاجة، بس أنا غيرها بحب أعرف اللي بيدور حواليا ومش بحب أبقى قاعدة في اللوكيشن ومش عارفه اللي حواليا ووالدتي أول واحده باركت لي على دوري في برغم القانون».