«السقا والعوضي هيقلقوا مني».. حازم إيهاب يتحدث عن مشاهد الأكشن في «إنترفيو»

 

كشف الفنان حازم إيهاب، عن تفاصيل شخصيته في مسلسل «انترفيو» الذي يقوم ببطولته مع الفنانة رنا رئيس، مشيرًا إلى أن مشاهد الأكشن أصعب ما واجهه خلال تصوير المسلسل.

 

 

وقال حازم إيهاب خلال لقائه في برنامج «It’s Showtime» التي تقدمه الإعلاميتان دينا حويدق وسمر نعيم على قناة «الحياة»: «المسلسل خلصان بقاله كتير أوي في شهر 10 السنة اللي فاتت وبدأنا تحضيرات من قبلها على طول وكلمني المخرج أحمد خالد أمين وقرأت الورق وحسيت إني عمري ما عملت دور زي ده قبل كدة».

 

 

أشار: «دور مليان مشاهد فيها أكشن وفرهدة وحسيت إن شاهين بيملك مفتاح في المسلسل، وهو الكائن الغامض ووراه حاجة لازم نفهمها.. ومعظم الأدوار اللي اشتغلتها قبل كده كان فيها لايت كوميدي وبطلع أهزر وروش وشاهين عكس كده تمامًا».

 

 

أما عن الصعاب التي واجهها خلال التصوير، قال: «كنا بنصور في صحراء والمياه والمطر كنا بنغرز وبنقع وعمال يتفاقم مننا ومش عارفين نلمه وفيه زوايا لازم تتاخد وكنا بنعيد كتير، وكان الجو برد جدًا وبترعش وعمالين يغطوني بـ 70 حاجة ورا بعض، وطلعت بخبرة كبيرة من العمل ده، وطلعت من العمل عارف إني ممكن أعمل أكشن في يوم من الأيام، وحبيت الأكشن».

 

 

وأردف مازحًا: «بتهيألي أحمد السقا أو أحمد العوضي محتاجين يقلقوا شوية لأني داخل السوق بقوة جدًا، وطبعًا بهزر، دول إخواتي».

 

 

كما أشاد حازم إيهاب بتعاونه مع منصة «Watch IT»، قائلًا: «الطريقة اللي بتشتغل بيها Watch it خرجت أجيال جديدة، عندنا دلوقتي عصام عمر وطه دسوقي ونور النبوي ومحمد الشرنوبي ولو كنا من سنتين تلاتة لو قولنا لمنتج نعمل مسلسل من بطولة عصام عمر كان حد هيعمله؟ لا مستحيل، لأن ثقافتنا كانت معتمدة على نجم يبيعوا باسمه العمل».

 

 

أبطال مسلسل انترفيو

 

 

مسلسل انترفيو يشهد البطولة المطلقة الأولى للفنانة رنا رئيس ويشاركها بجانبها عدد من الفنانين، أبرزهم: خالد شباط وميدو عادل وديانا هشام وسارة نور ومحمد العمروسي، وحازم إيهاب ونور بدر وخالد جواد وعدد أخر من الفنانين الشباب، وهو من تأليف أمينة مصطفى وإخراج أحمد خالد أمين.

 

 

اقرأ أيضًا:

 

قبل البدء بساعات.. تعرف على مواعيد وقنوات عرض مسلسل «انترفيو» لـ رنا رئيس

قبل عرض الحلقة الأولى من «انترفيو».. تعرف على دوريّ رنا رئيس وخالد شباط