فوضي المواقف العشوائية تثير الجدل في قلب العاصمة البحراوية ”بالصوت والصورة”

في الاونة الاخيرة ، كثرت المواقف العشوائية في شتي المحافظات ، وخصوصا في قلب العاصمة البحراوية- دمنهور - بميدان الساعة، فهي ليست بمنطقة نائية او في اطراف المدينة، بل في منتصف المدينة وأحد الشوارع الرئيسية والحيوية، حيث تقف سيارات الاجرة "الميني باص" وسط الشوارع دون احترام لقوانين المرور، فيؤدى إلى أزمة فى السيولة المرورية، وغير ذلك فإن بعض هذه السيارات لا تحمل لوحات معدنية بسبب عدم ترخيصها.
وتتبعت " الميدان "هذه الظاهرة بمحافظة البحيرة، لمعرفة سبب الأزمة، وطرق التغلب عليها، فرصدت مخالفات عديدة لسائقى السيارات، ما بين سيارات متهالكة ووقوف عشوائى يعوق حركة الشوارع، وإهمال من جانب المسئولين من حيث التفكير فى حل للأزمة، من جانب آخر، ربما لا يشعر المواطنون بخطورة هذه المواقف لاستفادتهم من وجودها، لكن هذه السيارات تمثل خطورة كبيرة، لأنها جزء من أزمة المرور، كما يسهل استخدامها فى العمليات الإجرامية لأنها غير مرخصة.

ففى ميدان الساعة بشارع الانصارى بجوار صيدلية مصر، مساحة الشارع صغيرة ولا تتحمل وجود سيارات بهذا الشكل، والأدخنة المتطايرة تتسبب فى كارثة للصيدليات فى المنطقة بحسب الدكتور على السيد، صيدلى، ٢٦ سنة: "العربيات دخانها عامل لينا مشاكل صحية خطيرة جداً، ده غير إن وجودها بالشكل ده بيخوف الناس تدخل الصيدلية، وده بسبب الخناقات المستمرة طول الوقت، وطبعاً مفيش يوم بيعدى من غير خناق، سواء بقى خناق مع بعض أو مع أصحاب العربيات التانية، وكمان اللى مسبب أزمة كبيرة فعلاً، إن العربيات دى بتقف غلط أصلاً لان ده مش موقف مرخص بيه ده موقف عشوائى".

 

"تعبنا من كتر ما قدمنا شكاوى ومفيش حد بيسمع لنا".. قالها أحد البائعين ويدعى محمود عبدالرحمن، ٣٩ سنة، عامل فى محل موبايلات، حيث أبدى غضبه مما يسببه هذا الموقف العشوائى من اختناق فى الشارع وعدم القدرة على السير بشكل طبيعى.

ويتحدث احد اصحاب المحلات الموقف العشوائى "ده بيأثر على شغلى وده لأن الزبون لو معاه عربية مش بيعرف يركن قصاد المحل، وبسبب الموقف ده الناس بتخاف تركن بعيد عن المحل، فلو لاقى زحمة قدام المحل بيسيبنى ويمشى، وهو عنده حق يخاف ينزل ويسيب عربيته".

ويضيف احد السكان فى المنطقة: " السواقين هنا ألفاظهم مش كويسة، وخناق على طول يعنى هما المسئولين مش هيفكروا فينا بقى، ويحاسبوا الناس دى، أو على الأقل يعملوا لهم موقف لأن ده موضوع خطير جداً، مهو متجيش تقول لى فيه خطف أطفال وسرقة، وانت سايب العربيات دى اللى ممكن لو عربية منها عملت مصيبة ولا حد هيعرف يجيبها أصلاً لانهم غير مرخصين ومش معروفين».