تفاصيل جديدة في قضية قتل سيدة بورسعيد على يد ابنتها وعشيقها

ننشر تفاصيل قضية قاتلة والدتها السيدة داليا الحوشي التي تبلغ من العمر 42 عامًا داخل منزلها بحي الفيروز بـ محافظة بورسعيد، بمساعدة عشيقها

كشف المتهم حسين في التحقيقات كواليس اللحظات المؤلمة لقتل السيدة، قائلًا: بعد ما اتفقت أنا ونورهان على قتل أمها علشان ما تفضحناش هي سابت لي الباب مفتوح، وأنا أخدت وأنا طالع البيت خشبه معايا وجبت شاكوش ودخلت، وساعتها أمها كانت في الأوضة بتاعتها نايمة، قمت ضاربها بالخشبة على راسها قامت من النوم وراسها متعورة وجايبة دم وفضلت تتكلم معانا، وإن موضوعي أنا ونورهان مش هينفع، وفجأة قامت مصوتة وجريت على الحمام وقفلت على نفسها، وفضلت تصوّت، وأنا ونورهان نزق الباب عشان نخرجها وهي تزقه من جوه لحد ما قدرنا نخرجها من الحمام.

وأضاف عشيق فتاة بورسعيد: ساعتها نورهان كانت محضرالي مايّة مغلية في حلة علشان نكبها على مامتها، وأخدت من نورهان الماية ورميتها على مامتها، بس ساعتها الماية كانت بردت شوية، عقبال ما طلعت ورميت الماية عليها قدام الحمام، وبعدها دخلنا الأوضو وقعدت تتكلم معانا شويه وساعتها نورهان خرجت من الأوضة عشان تمسح الدم اللي نزل من مامتها لما ضربتها بالخشبة، قالت لي خلاص أنا هجوزهالك ولو عاوز تاخدها ماشي خدها.

وأوضح المتهم في اعترافاته: قامت نورهان قالت لها أنا عايزة أروح عند عمتي، قالت لها روحي واعملي اللي انتي عاوزاه، وهي بتتكلم صوتها كان عالي علشان تسمع الجيران، وأنا ساعتها أم نورهان قالت لي خلاص كفاية ضرب، وراحت نورهان المطبخ وجابتلي سكينة إيدها بني وكانت كسره كاس قبل ما تديهولي، خدتها على السرير وقعدت فوقها ونورهان اديتني السكينة فخنقت أمها، وبالأيد التانية ضربتها بالسكينة في رقبتها، لكن الست مش ماتت لأن السكينة كانت تالمة.

واستكمل: كسرت الكاس وفضلت اضرب فيها لحد لما ماتت وقطعت النفس على السرير، ولقيت التيشيرت بتاعي كله دم، فنورهان قالت لي اقلع التيشيرت بتاعك فقلعته وحطيته على السرير، وحاولنا نشد مامتها نطلعها الصالة، لكن لقيناها تقيلة فسبناها جوة الأوضة، وقفلنا الأوضة ومسحنا الدم اللي في الطرقة، وبعدها أخذنا المخدة كلها دم وحطيناها في كيس أسود كبير من بتاع الزبالة، ونورهان اديتني تليفونين حطيتهم في جيبي ساعتها، وكان واقف أخوها أحمد وبيخبط على الباب وفضل يخبط فتره وما فتحناش، بعدها نورهان كلمته في التليفون وقالت له في رقم غريب بيكلمني وبيقول ماما متعورة، اسبقني على المستشفى أنت وآدم، واديهتا 20 جنيه لأخوها عشان يروح المستشفى، ولما راحوا نزلت نورهان وخدت معاها الخشبة وحطتها في الدور الأول، واديتها 100 جنيه علشان ما معهاش فلوس تركب.

يذكر أن المستشار حماده الصاوي، النائب العام، كان قد أحال الفتاة نورهان خليل والتي تبلغ من العمر 20 عامًا، والتي قتلت أمها بـ محافظة بورسعيد إلى محكمة الجنايات، وأحال المتهم حسين فهمي الذي لم يبلغ 15 عامًا إلى محكمة جنايات الأحداث، ووجهت النيابة للمُتهمين جريمة القتل العمد مع سبق الإصرار.