أسرة اللاعب محمد عمرو مصطفى تناشد المسئولين: محمد راح نتيجة الإهمال وحقه لازم يرجع»

تمكنت قوات الإنقاذ النهري من العثور على جثمان محمد عمرو مصطفى البالغ من العمر 17 عامًا، لاعب نادي الكهرباء الرياضي والذي غرق في النيل خلال تدريبات له أمس.

وتحدث خال محمد مصطفى، من أمام مشرحة زينهم، والذي كشف كواليس جديدة عن غرق نجل شقيقته، قائلًا: 'محدش من النادي اتحرك معانا من امبارح لغاية النهاردة، وزارة الشباب والرياضة أرسلت النائب بتاعها الساعة 2 ونصف بعد منتصف اليل، قعد نص ساعة أثبت حالة ومشي، الله أعلم عمل اية واتكلم مع المدرب ورئيس النادي في إيه'.

وأضاف: 'إحنا مش طالبين أكثر من حق ابننا يرجع سوء حصل تقصير من النادي او اي حاجة، محمد ليه حق لازم يرجع، محمد مسالم بدرجة فوق الوصف.. هواء ماشي على الأرض هو من أطيب خلق الله'.

وعن حالة الأم والأب، عقب قائلًا: 'الأم في حالة انهيار وفي أسوأ ما يكون، الله يكون في عونها ويصبرها، والله يكون في عون والده وربنا يصبر، محمد راح نتيجة الأهمال، ولو كان لابس لايف جاكت حتى لو غرق كان قب على وش المياه'.