الفنان أسامة عباس ”أنا معتزلتش الفن ومكنتش متصور أنى هستمر فى التمثيل وكنت فاكر أنه تحدى”

امير بسيونى

قال الفنان أسامة عباس خلال تصريحات تلفزيونية لبرنامج "يحدث في مصر" مع الإعلامي شريف عامر والمذاع عبر شاشة "mbc مصر" "سعيد جدًا لأنى أتكرمت من أكثر من جهة ومن مكان، ولكن التكريم لما ييجي من أبناء بلدى وأبناء مهنتى وفى حياتي بيكون له قيمة تانية خالص وقيمته كبيرة جدًا".

وعن علاقته بأحفاده قال، "العلاقة بينى وبين أحفادى صحوبية أكثر من أني جدهم، ومش بيقولوا لي يا جدو بيقولوا لي يا أُس، أقولهم عيب أنا جدكم يقولوا لى الكلام ده كان زمان، وبكون سعيد من جوايا باللى بيقولوه، وناجحين في شغلهم وكلهم خلصوا جامعة ما عدا الأخير أطول واحد فيهم آخر سنة، ولما يخلص يمكن يقولي يا جدى نفسى حد فيهم يقولي يا جدي، لأن كلهم بيقولوا لى يا "أس" ولكن ده دليل على حبهم ليا".

وأضاف الأجيال الجديدة مش بيعجبها الشغل القديم وبيتفرجوا عليه زى ما إحنا بنتفرج على التاريخ، يعنى بالنسبة لهم تاريخ مش متعة، والمتعة بالنسبة لهم مختلفة ونوع الضحك والإفيه مختلفين وحياتهم كلها مختلفة، حتى زمان الشياكة إننا نلبس بدلة لكن دلوقتى الشياكة إننا نقلع البدلة.

وتحدث عن بدايته قائلًا "مكنتش متصور أنى هستمر فى التمثيل وكنت فاكر أنه تحدى وأنا بحب التحدى فهعمله وهرجع شغلي، ولكن رواية في نجاح في رواية ابتدت المسائل تختلف وساعدتنى زوجتى وقدرت أنها ما تشتغلش وتتولى تربية الأولاد علشان تدينى وقت أكتر للشغل لأنى كنت بشتغل بالصبح والليل وقدرت أنها تحافظ على الأولاد.

وأستكمل الأولاد مشيوا في حياتهم لكن محدش فيهم مثل ولا حد فكر يمثل، ومشفتش حد فيهم عنده الموهبة الكافية اللي تخليه في المستقبل ممثل.

وقال عن اولاده الكبير خريج آداب إنجليزي والثانى مهندس يعني كلهم خريجين مستويات أعلى بكتير من اللي إحنا كنا فيها.. ومحدش فيهم اندفع ناحية التمثيل، وكانوا أحيانًا يطلبوا يمثلوا لكن مشفتش حد أصر.

وعن الأدوار التى كان يتمنى أن يقدمها قال، أنا قدمت كل الأنواع، ومقتنع باللى عملته ودايمًا أقولهم كفاية خلاص الحمد لله قدمت كل الأنواع اللى ترضيني وترضى اللى حواليا "هعوز إيه أكتر من كده فى الدنيا".

وبشأن حقيقة إعتزاله الفن قال، أنا معتزلتش الفن، ولكن مش عارف إذا جالى شغل هعمله ولا لأ، لأن أنا مبقتش في سن يسمح لي أنى أبذل المجهود اللى بذلته فى شغلى خاصة أنى باخد المسائل بجد، ولو أتعرض عليا دور علشان يعجبنى لازم يكون فيه جهد ومعتقدش أني هقدر أعمل الجهد ده دلوقتى، ويارب ما يتعرض عليا علشان ما أتحطش في الاختبار.

وكشف عن سر خلعه للساعة التى كان يرتديها موضحًا "قلعتها علشان ما أكونش مقيد بالمواعيد لأنى كنت منضبط جدًا في شغلي".

والجدير بالذكر أن المهرجان القومي للمسرح، كرم الفنان أسامة عباس، ضمن فعاليات الدورة الـ17، برئاسة الفنان محمد رياض، تقديرًا لمسيرته الفنية، وتسلم حفيده التكريم الخاص به فى حفل الافتتاح، والذي قدمه قبل التكريم الفنان الكبير أحمد فؤاد سليم.