أبرز تصريحات ناهد السباعي : المتحرشين ناس مريضة.. وهذه نصيحتي للفتيات

أعربت الفنانة ناهد السباعي عن غضبها من ظاهرة التحرش، قائلة: "بقى فيه أمراض نفسية كتير والناس بقت مريضة".

وتابعت خلال لقائها ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "إحنا دلوقتي بقينا أحسن من زمان كتير في تراجع ظاهرة التحرش، والبنات بقى لها صوت وبترفع قضايا ضد المتحرشين"

وأضافت: "أنا مقدرش أنصح أي بنت أنها تأخد أكشن عنف في لحظة تعرضها للتحرش لأني شوفت بنات اتضربت بمطاوي في وشها في مولات بسبب دفاعهم عن نفسهم ضد المتحرشين، ولكن اللي تقدر تأخد حقها من غير ما تؤذي نفسها كويس ولكن تأخد حقها بالقانون أحسن، وأنا خايفة أنصح أي بنت بالجرأة فتتعرض للفتك بها والإيذاء".

وفي نفس اللقاء وجَّه الإعلامي عمرو أديب، سؤالًا محرجًا للفنانة ناهد السباعي، قائلًا: "ممكن رجالة كتير تحس أنك صعبة عليهم؟".

 

وعلقت ناهد السباعي خلال لقائها ببرنامج "الحكاية" المذاع على قناة "إم بي سي مصر"، ضاحكة: "ولا صعبة ولا حاجة هما شايفيني صعبة علشان الرياضة اللي بلعبها ممكن، جدتي شخصيتها قوية ومش طبيعية، لكن أنا شخصيتي عادية مش صعبة بس محدش يقدر يجرى ورايا في البيت".

وكرر عمرو أديب سؤاله لناهد السباعي: "محدش بيعاكسك معاكسة طويلة؟"، لترد الفنانة: "أي ست بتتعاكس، ولكن أنا معنديش وقت حتى أقعد مع قرايبي أو صحابي، علشان كده مفيش معاكسات، ولكن أنا نفسي يبقى عندي زوج وأسرة وبيت".

ولفتت: "أنا بحب الأسرة وعلطول مع أمي وإخواتي.. ونفسي أتجوز، ولكن والدي الله يرحمه وأخويا عاملوني معاملة حلوة علشان كده أنا مش هقبل أني أتجوز أي واحد، وبقولك يا عمرو لو عندك عريس مناسب قولي".

وتابعت: "لم جدي يبقى فريد شوقي لازم يبقى سقف طموحاتي عالي شوية في شريك حياتي".

وأشارت ناهد السباعي: "أنا نفسي يبقى عندي أسرة ولسه عمري 32 سنة".